ЯҢАЛЫКЛАР

Апас муниципаль районында ике атналык укулар башланды. Министрлар кабинетының баш ветеринария идарәсе һәм Казан дәүләт ветеринария медицинасы академиясе хезмәткәрләре белән берлектә оештырылган укуларда 14 терлекче катнаша. Беренче атна дәвамында ветеринария белгечлеге буенча теоретик белем алсалар, икенче атна дәвамында хуҗалыкта укуларның практик өлеше үтәчәк.

21 нче ноябрь көнне Дәүләт ветеринария инспекциясе Яр Чаллы территориаль бүлеге инспекторлары Яр Чаллы шәһәрендә тиешсез урында сату итүне ачыклау буенча рейд үткәрде. Рейд вакытында ветеринария өлкәсенә кагылышлы кагыйдә бозулар ачыкланмады дип хәбәр итә территориаль бүлек.

19 нчы ноябрь көнне Азнакай шәһәрендә чираттагы көзге ярминкә узды. Анда авыл хуҗалыг предприятиеләре, шәхси эшмәкәрләр, авыл хуҗалыгы продукциясе белән шөгыльләнүчеләр үз продукцияләрен тәкъдим итте. Сатуга чыкканчы барлык төр продукция дә катгый ветеринария тикшерүе үтә. Сыйфатсыз азык-төлек яки ветеринар документлары булмаган продукция сатуга чыга алмый. Моны Дәүләт ветеринария инспекциясенең Әлмәт территориаль бүлеге инспекторлары контрольдә тотты.

Район ветеринар станция лабораториясе киләчәктә Идел буендагы барлык субъектларның терлек азыгы сыйфатын тикшерәчәк. Лабораториянең бүгенгесе сокланырлык. Биредә терлек азыгы аксымын, дымлылыгын, «жмых» мочевинасын тикшерәләр. Эшли башлаган 17 октябрьдән бүгенге көнгә кадәр 60лап «проба» тикшерергә өлгергәннәр инде. Лабораториягә яңа җитәкче билгеләнгән. Бу вазифаны Шәүкәт Рәфкать улы Яруллин башкара. BLGG Agro Xpertus (Би Эл Джи Джи Агроэкспертус) фирмасының Мәскәү асты Куркино шәһәрендәге филиалы җитәкчесе Надежда Байман да безнекеләргә ышаныч белдерә дигән фикер туды. Әнә шундый үзәк булдырырга дигән ният белән Әтнәгә килеп китте ул. Ә Куркино шәһәрендәге ул җитәкләгән лаборатория Россиядә әлегә иң көчлесе. Биредә терлек азыгы сыйфатын һәм туклыклылык кыйммәтен 35 параметр буенча тикшерәләр. Лаборатория инде 80 елдан артык лидерлыкны югалтмый, биредә елына 50 меңнән артык проба тикшерелә. Төп лаборатория Нидерландта, ә филиаллары Бельгия, Германия, Дания, Швеция, Испания кебек илләрдә урнашкан. Шунысы мөһим – лаборатория үз эшчәнлегендә клиент һәм партнерларына аналитик ярдәм күрсәтә. Районның ветеринар станциясе җитәкчесе Рөстәм Һашимов: – Бүгенге көндә безнең барлык хуҗалыклар диярлек терлек азыгын шунда тикшертә, - ди. - Әтнәдә мондый лаборатория булдыру нияте бер дә юктан гына тумаган. Һәркем белә, безнең район терлекчелек өлкәсендә Татарстанда гына түгел, Россия буенча лидерлар сафында. Көчле лаборатория үзәген бездә булдырырга теләүләре табигый. Надежда Байман башта Татарстанның авыл хуҗалыгы һәм азык-төлек министрлыгында булган, җитәкчеләр белән киңәшә. Аннан соң республика ветеринар лаборатория җитәкчесе Марс Вәлиев белән Әтнәгә киләләр. Рөстәм Һашимов сүзләренә караганда, Надежда Байман безнең лаборатория мөмкинлекләрен карап танышкан һәм күргәннәрдән канәгать калган. Тиздән район ветеринар станция лабораториясенә яңа төр җиһазлар кайта башлый, кайбер чыганаклар буенча, яңа төр җиһазлар 25 миллион сумлык булачак. Тупас терлек азыгын җитештерү һәм консервацияләү буенча да заман таләпләренә җавап бирү йөзеннән, инновацион эшчәнлек алымнарын кулланырга кирәк булачак. Кыскасы, BLGG Agro Xpertus лабораториясенең төп принцибы бездә дә кулланышка алыначак: авыл хуҗалыгы предприятиеләре яңа системалар исәбенә төгәллеккә ирешеп, югары керем алачаклар.

Дәүләт ветеринария инспекциясенең Саба территориаль бүлеге хезмәткәрләре Биектау районы Мәмдәл авылында тиешсез урында сату итүне кисәтү максатыннан рейд оештырган. Тикшерү барышында автомобильдән, документларсыз гына 5 баш бозау сату очрагы теркәлгән. Кагыйдә бозучы административ җаваплылыкка тартылган, сату туктатылган.

Бүген Апас районында Идел аръягы зонасында сөт сыйфатын тикшерү нәтиҗәләренә багышланган киңәшмә үтте. Шунда ук эре мөгезле терлекләрдә лейкоз авыруын булдырмау турында да сүз барды. Киңәшмә эшендә Баш ветеринария идарәсе җитәкчесе Алмаз Хисамутдинов, аның урынбасары Алмаз Гибадуллин, “Ак Бар” агрохолдингы директоры урынбасары Камил Галиев, авыл хуҗалыгы предприятиеләре җитәкчеләре, баш ветеринар табиблар, зоотехниклар катнашты. Күптән түгел Республика ветеринария лабораториясе белгечләре Идел аръягы зонасындагы 8 муниципаль районда сөт сыйфатын тикшергән иде. Бүген шушы мероприятиягә нәтиҗәләр ясалды. Авыл хуҗалыг предприятиеләре җитәкчеләре алдына куелган беренчел бурыч – сөтнең сыйфатын яхшырту.

Бүген Баш дәүләт ветеринария идарәсененң территориаль бүлек ветеринария инспекторлары уртак проблемалрны уртага салып сөйләште. Баш ветеринария идарәсе җитәкчесе урынбасары Алмаз Гыйбадуллин территориаль бүлек инспекторлары алдына беренчел бурычларны куйды: үләт базларының торышын контрольдә тоту, ферма тирәсе территорияләрендә тиешле тәртип урнаштыруны контрольдә тоту һәм Татарстан территориясенә кертелә торган терлекчелек продукциясе сыйфатына җаваплылык.

Сарман районында узган 10 айлык эш нәтиҗәләренә багышланган киңәшмә узды. Авыл хуҗалыгы терлекчеләре мал санын саклау, терлекчелек продукциясе сыфаты хакында фикер алышты. Белгечләр лейкоз авыруын бетерү, сөт сыйфаты, ферма янында тәртип урнаштыру, ветеринар кагыйдәләрнең төгәл үтәлүе турында да сөйләште.

Казан территориаль бүлек ветеринар инспекторлары Лаеш шәһәрендә документларсыз терлекчелек продукциясен сату фактын кисәткән. Сыер итеннән ясалган фаршка ветеринария тикшерүе узганлыгы турында документлар булмаган. Бу продукция сатудан алынган.

Баш дәүләт ветеринария идарәсенең ветеринария инспекциясе Алексеевск территориаль бүлеге инспекторлары Нурлат һәм Аксубай раоннарында рейд оештырган. Рейд вакытында дуңгызларның ирекле рәвештә урамда йөрү факты ачыкланмаган.