Кайбыч районында киңәшмә узды
Кайбыч районында терлекләр һәм кошлар арасында йогышлы авырулар керүне һәм таралуны кисәтүгә юнәлдерелгән киңәшмә узды.
Чараны Татарстан Республикасы Министрлар Кабинетының Баш ветеринария идарәсе башлыгы урынбасары Габделхак Мотыйгуллин үткәрде. Анда район башлыгы, җирле авыл хуҗалыгы предприятиеләре җитәкчеләре һәм авыл җирлекләре башлыклары катнашты.
Авыруларның беренче билгеләренә оператив җавап бирү һәм ветеринария хезмәтенә кичекмәстән хәбәр итү зарурлыгына аерым басым ясалды. Бу югалтуларны булдырмаска ярдәм итәчәк һәм фермер хуҗалыкларының һәм эре терлекчелек комплексларының тотрыклы эшләвен тәэмин итәчәк.
Киңәшмәдә чыгыш ясаган Габделхак Мотыйгуллин өч факторның мөһимлеген аерым билгеләп үтте: барлык терлекләрне вакытында массакүләм вакцинацияләү; терлекләрнең һәм кошларның сәламәтлеге торышын даими күзәтү, терлекләрне күчереп йөртүне катгый контрольдә тоту.
Моннан тыш, теләсә нинди шикле симптомнарга игътибар итү һәм вакытында тиешле органнарга мөрәҗәгать итү кирәклеге ассызыкланды.
Катнашучылар биналарны һәм транспорт чараларын дезинфекцияләүнең даими процедураларын оештыру мәсьәләләрен, шулай ук хуҗалыклар территориясендә санитария нормаларын саклауның гомуми алымнарын карадылар.
Йогышлы авырулар килеп чыгу һәм таралу куркынычын киметүгә юнәлдерелгән бу алымнар, төбәкнең авыл хуҗалыгы тармагының тотрыклы үсешенә ярдәм итәчәк.