Кайбыч районында масштаблы өйрәнүләр узды
Кайбыч районында аеруча куркыныч авырулар – себер түләмәсе һәм кош гриппы учакларын бетерүгә юнәлдерелгән масштаблы өйрәнүләр узды. Чарада район администрациясе, ветеринария хезмәте, гадәттән тыш хәлләр министрлыгы белгечләре, шулай ук медицина учреждениеләре һәм хокук саклау органнары вәкилләре катнашты.
Өйрәнүләр сценарие буенча, район торак пунктларының берсендә себер түләмәсенә шикләнеп терлекләрнең үлүе теркәлгән. Параллель рәвештә җирле кошчылык фабрикасында кош гриппы таралу турында мәгълүмат та килде. Оператив хезмәтләр кичекмәстән югары әзерлек хәленә китерелде.
Өйрәнүләр барышында карантин постларын оператив җәелдерү, дезинфекция чараларын оештыру, халыкны йогышлы зонадан эвакуацияләү, шулай ук биологик калдыкларны утильләштерү мәсьәләләре каралды. Төрле ведомстволар арасындагы хезмәттәшлеккә һәм гадәттән тыш хәл шартларында гамәлләрне координацияләүгә аерым игътибар бирелде.