Терлекчелекнең зыянлы продуктлары белән эш итүгә яңа таләпләрне аңлаттылар
Бүген Татарстан Республикасы Министрлар Кабинетының Баш ветеринария идарәсе җитәкчелеге «Терлекчелекнең зыянлы продуктлары белән эш итүгә яңа таләпләр» темасына киңәшмәдә катнашты.
Киңәшмә Авыл хуҗалыгы идарәләре башлыклары һәм хуҗалык җитәкчеләре катнашында ТР авыл хуҗалыгы һәм азык-төлек министры урынбасары Ленар Гарипов рәислегендә узды.
Эш барышында терлекчелекнең өстәмә продуктлары өлкәсендәге яңалыклар аңлатылды. Хөкүмәтнең тиешле карары 2023 елның 1 мартыннан үз көченә керде һәм 2029 елның 1 мартына кадәр гамәлдә булачак. Бу хакта Россельхознадзорның ТР буенча идарәсе җитәкчесе Илнур Галиев сөйләде. Ул хәбәр иткәнчә, бу закон буенча терлекчелекнең өстәмә продуктларына авыл хуҗалыгы хайваннарын тотканда барлыкка килгән тирес, тизәк, аслык һәм агынты сулар керә.
Яңа таләпләр терлекчеләргә тиресне җитештерү калдыкларына яки терлекчелекнең өстәмә продуктларына кертү турында карарны мөстәкыйль кабул итү хокукы бирә. Бу агробизнесны саклау законнарын бозу белән бәйле финанс куркынычларыннан коткарыр дип көтелә.