Казанда йортсыз этләрне аулауга заявкалар кабул итүнең бердәм номеры эшли башлады

2021 елның 8 июле, пәнҗешәмбе

Казанда йортсыз этләрне аулауга заявкалар кабул итүнең бердәм номеры эшли башлады. Бүгенге көннән Татарстан башкаласында күзәтүчесез хайваннарны аулауга заявкалар кабул итү буенча бердәм линия эшли башлый, дип хәбәр итә торак-коммуналь хуҗалык комитеты.

Казанлылар мөрәҗәгатьне тәүлекнең теләсә кайсы вакытында 7(843)222-0-444 телефоны буенча бирергә мөмкин - сервис тәүлек буе эшли ала. Бөтен шалтыратуларны тавыш роботы кабул итә. Тавыш сигналыннан соң ул шалтыратучыга үз исемен атарга һәм йорт хайванының кайда табылганын тәфсилләп сөйләргә тәкъдим итәчәк. Кергән барлык хәбәрләр Казан башкарма комитетының Торак коммуналь хуҗалык комитетына тапшырылачак, аннан аларны махсус оешма адреслаячак.