Тиз йогышлы кош гриппының дөнья буйлап таралуы панзоотия масштабларын алды
Дөнья буйлап тиз йогышлы кош гриппының таралуы панзоотия масштабларын алды, ди белгечләр. Европа илләрендә хәл аеруча катлаулы, анда авыру чыганаклары саны меңнәр белән санала. Хайваннар сәламәтлеген саклау оешмасы мәгълүматлары буенча, быелның беренче алты аенда Европа илләрендә 3 меңнән артык кош гриппы очрагы теркәлгән. Франциядә хәл исә критик ноктага җитеп килә, чөнки барлык ачыкланган очракларның яртысы диярлек Франциягә туры килә. Авыруның коммерцияле кошчылык фермаларында килеп чыгуы кошчылыкка тагын да зур зыян сала.
АКШТА соңгы җиде елда кош гриппы таралуы күзәтелә, анда 40 миллионнан артык тавык һәм күркә юк ителгән.
Россиядә чит илләрдәге вәзгыять белән чагыштырганда, эпизоотия вазгыяте контрольдә тотыла, дип әйтергә кирәк. 2022 елның 8 ае эчендә илнең 15 субъектында 51 кош гриппы очрагы теркәлгән.
Хайваннар сәламәтлеген саклау федераль үзәге галимнәре киләсе айларда кош гриппы буенча тискәре фараз бирәләр. "Күчмә кошлар миграциясе яңа шау-шу куркынычын китерәчәк һәм яңа штаммнар барлыкка килергә мөмкин. Кошчылык сәнәгатендә янә кош гриппы таралу куркынычы зур булып кала. Хәтта югары дәрәҗәдә саклана торган предприятиеләр дә вирус керүдән сакланмаган", - дип билгеләп үтә экспертлар.
Шуңа күрә Россия кошчылары авыл хуҗалыгы министрлыгыннан сәнәгать баш санын кош гриппына каршы вакцинацияләүне сорый, дип хәбәр иттеләр Россия кошчылык берлегендә. Россиядә кошчылык фабрикаларында кош гриппына каршы моңарчы вакцинация беркайчан да үткәрелмәгән иде. Хәзергә безнең илдә кошларны бу авыруга каршы шәхси хуҗалыкларда гына иммунизацияләү рөхсәт ителә. Галимнәр кошлар гриппы панзоотиясе шартларында Россия кошчылык фабрикалары өстәмә яклауга мохтаҗ, дип саный.