Ярминкә мәйданнарын Казан мэры карады
Бүген Казан шәһәренең 15 мәйданчыгында, ике Яшел Үзән муниципаль районында: Яңа Тура бистәсендә һәм Осиново бистәсендә, Яр Чаллы һәм Түбән Кама мәйданчыкларында традицион авыл хуҗалыгы ярминкәләре дәвам итте. Бүген Батыршин урамындагы ярминкә мәйданчыгында Татарстан Республикасы авыл хуҗалыгы һәм азык-төлек министрының беренче урынбасары Наил Залаков белән бергә Казан мэры Илсур Метшин да булды.
Шәһәр мэры продукциянең җитәрлек күләмдә булуына шәхсән үзе ышанды. Шәһәр халкына арзан бәядән продукция ассортименты бай иде. Бу ит, казылык продукциясе, төрле сөт, сыр, май, йомырка, яшелчә, бал, шикәр, он, ярмалар һәм Татарстанның муниципаль районнарыннан китерелгән башка фермер продукциясе. Дәрвишләр бистәсендәге мәйданчыкта Әлки районы авыл хуҗалыгы товар җитештерүчеләре сәүдә алып барган. «Казан» агросәнәгать паркы каршындагы мәйданчыкта Нурлат, Саба, Балтач муниципаль районнары үз продукциясен тәкъдим итте. Батыршин урамындагы базарда Буа аграрийлары сәүдә итте.
Татарстан Республикасы Министрлар Кабинетының Баш ветеринария идарәсе боерыгы буенча барлык мәйданчыкларда Баш ветеринария идарәсе, шәһәр ветеринария берләшмәсе белгечләре һәм ветеринария-санитария экспертлары эшли. Шулай ук Россельхознадзорның Татарстан Республикасы буенча идарәсе инспекторлары кизү тора. Барлык таләпләр ярминкәдә сатыла торган продукциянең сыйфатлы булуына юнәлтелгән. Сыйфаты түбән булган продуктлар сатуга рөхсәт ителми.
Исегезгә төшерәбез, язгы авыл хуҗалыгы ярминкәләре 15 мәйданчыкта һәр шимбәдә 23 апрельгә кадәр, 6.00 сәгатьтән 12.00 сәгатькә кадәр булачак. Авыл хуҗалыгы ярминкәләрендә Татарстанның барлык районнарыннан диярлек фермерлар катнаша: Яңа Чишмә, Спас, Әлки, Буа, Биектау, Кама Тамагы, Алексеевск, Теләче, Кайбыч, Балык Бистәсе, Чүпрәле, Питрәч, Тәтеш, Лаеш, Әтнә муниципаль районнары. Шулай ук Фермерлар һәм крестьян хуҗалыклары һәм агрохолдинглар ассоциациясе дә булачак.